Iisa isahin ng adminstration ang Pro-Impeach bloc

From Abante-tonite:

Hindi lamang umano pagbabayad-utang sa mga kongresistang naging kasangkapan ng Malacañang sa pagpatay sa impeachment case ang binabantayan ngayon ng oposisyon kundi pati na rin ang magiging resbak ni Pangulong Gloria Macapagal-Arroyo sa kanilang hanay.

Ayon kay Sen. Panfilo "Ping" Lacson, inaasahan ng pro-impeachment group, sa pangunguna ng limampu’t isang congressmen at ilang personalidad na nasa likod ng pagtutulak sa kaso laban kay Mrs. Arroyo ang magiging buwelta ng administrasyon.

"Isa pang gagawin niya sa nakikita natin, isa-isa niyang babalikan, gagantihan ang mga na-involve sa effort ng pag-impeach sa kanya. Pero magagawa ba niya lahat ito? Sinong tatargetin niya? More or less may idea tayo sino ang target niya," prediksyon ni Lacson.

Nagbabala rin si Lacson na lalo pang magkakawindang-windang ang liderato ng Pangulo kapag niresbakan ang mga kongresistang pumabor sa impeachment complaint, katulad din sa ginagawa nitong pagbabayad-utang sa mga pinakinabangan upang maibasura ang reklamo sa Lower House.

"Pero lalong magkakaloko-loko ang governance dahil ang concentration na lang niya ay paboran ang mga tumulong at gantihan ang mga nagtutulak na ma-impeach siya so wala na tayong kinabukasan," ani Lacson.